Puisi Bahasa Banjar

SUMANGAT MAWAJA PAANDUNGAN

Limbah basubuh
Maulur jukung, malawan galumbang
Mamacah buih Sungai Barito
Manggambar sumangat nang mawaja di dada

Pasar Tarapung di laluinya
Mancuba manyasah tungkang batubara
Handak bakuciak “Gunung amas hirang kami jangan diangkut”
Sarasa kada taucap
rasa karau karungkungan masih tarasa
bakas sumalam mamparutis bayaran sakulah

Mancuba balabuh di hujung Pulau Kambang
Manjarajak lumpur wan pipa wasi
Gasan mancari sasuap nasi
Tapi nasib kada bapihak
Sampai kamarian kadada razaki

Bulik rasa pasrah
Tabayang salalu garunum tukang renten wan guru sakulah
Dimapa hutang kawa dibayar
Dimapa anak kawa sakulah

DI ILUNG HIDUP TAGANTUNG

Jukungnya malaju
Maumpati arus tuju kahulu
Matan Kenanga* membawa sumangat mawaja
Malincai ilung, mahidupi kulawarga

Burrr, mancaburi razaki di Sungai Martapura
Tangguk nang di bawa di susupakannya
Baharap undang bapasrah diri
Mambari razaki gasan hari ini

Sayang di sayang
Undang diharap tak kunjung datang
Hati pusang maingat hutang
Tangguk panyadang handak dibuang

Uiiii, nasib fakir
Kada kawa di ampihi hanya wan zikir
Biar barazaki ataupun kada
Tapi bausaha adalah kuncinya

Tangguk mulai di susupakannya lagi
Karena razaki rahasia Illahi

Ket : * Kampung Kenanga Sungai Jingah Banjarmasin

Hasil Karya